वैशाख ८ –वीरगंज महानगरपालिका क्षेत्रमा मुख्य सडकको दायाँबायाँ २५ मिटरभित्र रहेका अतिक्रमित संरचना हटाउने कार्य सम्पन्न भएको छ। आइतबार बिहानदेखि डोजर प्रयोग गरी सुरु गरिएको अभियान सोमबारसम्ममा सम्पन्न भएको सडक डिभिजन कार्यालय हेटौंडाले जनाएको छ।

त्रिभुवन राजपथअन्तर्गत गण्डक चोकदेखि नेपाल–भारत मितेरी पुलसम्मको सडक खण्डमा रहेका करिब १ हजार २ सय घरटहरामा दुई दिनभित्रै डोजर चलाइएको कार्यालयले जानकारी दिएको छ। यसले लामो समयदेखि रहेको अतिक्रमण हटाउने अभियानलाई तीव्र रूपमा अघि बढाइएको देखिन्छ।

कार्यालयकी इन्जिनियर दिलासा तिवारीका अनुसार भत्काइएका संरचनाबाट निस्किएको फोहोर छिट्टै व्यवस्थापन गर्ने तयारी भइरहेको छ। साथै, सडक निर्माणका लागि आवश्यक विस्तृत परियोजना प्रतिवेदन (डिपिआर) तयार गर्न विभागअन्तर्गतकै उत्तर–दक्षिण आयोजना निर्देशनालयलाई आग्रह गरिएको उनले बताइन्।

उनका अनुसार हाल बजेट अभावका कारण डिपिआर तयारीकै चरणमा रहेको छ। डिपिआर तयार भएपछि मात्रै केन्द्र सरकारबाट बजेट प्राप्त हुने र त्यसपछि निर्माण प्रक्रिया अघि बढ्ने जनाइएको छ।

बजेट उपलब्ध भएपछि गण्डक चोकदेखि मितेरी पुलसम्मको सडक खण्डलाई ६ लेनमा विस्तार गर्न ठेक्का प्रक्रिया सुरु गरिनेछ। सडक डिभिजन कार्यालयका अनुसार डिपिआर तयार हुन ३ देखि ४ महिना लाग्नेछ भने आगामी आर्थिक वर्षदेखि निर्माण कार्य सुरु हुने सम्भावना रहेको छ। निर्माण कार्य सम्पन्न हुन कम्तीमा दुई वर्ष लाग्ने अनुमान गरिएको छ।

यसअघि जिल्ला प्रशासन कार्यालय पर्साले सूचना जारी गर्दै सो क्षेत्रमा रहेका संरचना १२ घण्टाभित्र हटाउन निर्देशन दिएको थियो। सोही निर्देशनअनुसार छोटो समयमै अधिकांश संरचना हटाइएको हो।

अभियानपछि वीरगंजको मुख्य बजार क्षेत्र प्रभावित बनेको छ। भत्काइएका संरचनाको फोहोर अझै व्यवस्थापन नभएकाले बजार क्षेत्र खण्डहरजस्तो देखिन थालेको स्थानीयको गुनासो छ।