बिरगंज –बिरगंजस्थित नेसनल मेडिकल कलेजले पार्किङ शुल्कको नाममा दैनिक लाखौं रुपैयाँ ठगी गरिरहेको पाइएको छ। उपचार गराउन आउने बिरामी र उनीहरूका आफन्तबाट अस्पतालले अनावश्यक शुल्क असुल्दै आएको खुलासा भएको छ। अस्पताल परिसरमा पार्किङ गरेबापत प्रत्येक सेवाग्राहीसँग १० रुपैयाँदेखि २५ रुपैयाँसम्म शुल्क लिइने गरिएको छ, जसले गर्दा दैनिक रुपमा ठूलो आर्थिक फाइदा अस्पतालले उठाइरहेको छ।
साधारण उपचारका लागि आउने बिरामी र उनीहरूको साथमा आउने आफन्तलाई अस्पताल प्रवेश गरेकोबित्तिकै पार्किङ शुल्क तिर्नुपर्ने बाध्यता रहेको छ। यो शुल्क सबै सेवाग्राहीबाट अनिवार्य रुपमा असुलिँदै आएको छ, जसका कारण उनीहरूलाई आर्थिक बोझ परिरहेको छ। धेरैजसो बिरामी आर्थिक हिसाबले कमजोर भएका कारण यस किसिमको शुल्कले उनीहरूलाई थप तनाव दिने गरेको बताइएको छ।
यसरी अनियमित रुपमा लिइएको पार्किङ शुल्क अस्पतालकै ठेकेदार र व्यवस्थापनको मिलेमतोमा असुलिँदै आएको आरोप स्थानीयहरूले लगाएका छन्।
