राजन कु. बानिया –पर्सा, २ पुस। पर्साको धोबिनी गाउँपालिका वडा नं. ५, धोबिनीमा शिक्षकहरूलाई लक्षित गरी IEMIS सम्बन्धी तीन दिने तालिम आजदेखि सुरु भएको छ।

धोबिनी गाउँपालिकाको आयोजनामा सञ्चालन गरिएको उक्त IEMIS तालिम धोबिनीस्थित श्री अजिज मियाँ माध्यमिक विद्यालयमा सम्पन्न भइरहेको छ। तालिमको उद्घाटन वडा नं. ५ का वडाअध्यक्ष मनौवर मियाँले गर्नुभएको थियो।

उद्घाटन कार्यक्रममा गाउँपालिका शिक्षा प्रमुख जितेन्द्र प्रसाद चौहान, विद्यालयका प्रधानाध्यापक जितेन्द्र राम, श्री कालिप्रसाद माध्यमिक विद्यालयका प्रधानाध्यापक हरिओम पटेल, भिखमपुर माध्यमिक विद्यालयका प्रधानाध्यापक विनय प्रसाद कुर्मी लगायत प्रधानाध्यापक तथा शिक्षकहरूको उपस्थिति रहेको थियो।

तालिममा एकीकृत शैक्षिक व्यवस्थापन सूचना प्रणाली (IEMIS) सम्बन्धी विषयमा प्रशिक्षक जगमोहन रौनियारले प्रशिक्षण दिनुभएको थियो। गाउँपालिका भरिका विद्यालयहरूलाई सुधार गर्ने उद्देश्यले शिक्षकहरूलाई IEMIS सम्बन्धी तालिम प्रदान गरिएको सहायक प्रशिक्षक गोविन्द पटेलले जानकारी दिनुभयो।

त्यसैगरी, विद्यालयहरूमा दिवा खाजा कार्यक्रम, विद्यालय सुधार योजना, समयमा परीक्षा सञ्चालन, नयाँ शिक्षण विधि लगायतका विषयमा सुधार तथा व्यवस्थापनसम्बन्धी जानकारी गराइएको गाउँपालिका शिक्षा प्रमुख जितेन्द्र प्रसाद चौहानले बताउनुभयो।

तीन दिनसम्म सञ्चालन हुने उक्त IEMIS तालिममा धोबिनी गाउँपालिका भरिका १८ वटा विद्यालयका शिक्षकहरूको सहभागिता रहेको छ।