वीरगञ्ज । मधेस प्रदेशका खेलकुद तथा समाज कल्याणमन्त्री प्रमोद जयसवाल आज पर्सा जिल्लाका चारवटै निर्वाचन क्षेत्रमा विकासका विभिन्न कार्यक्रमको उद्घाटन र शिलान्यासमा व्यस्त रहे।

बिहान पर्सा क्षेत्र नम्बर १ अन्तर्गत वीरगञ्ज महानगरपालिका वडा नम्बर २० मा आयोजित गढीमाई प्रिमियर लिगको भव्य उद्घाटन मन्त्री जयसवालले गरे। यस प्रतियोगिताले स्थानीय युवा खेलाडीहरूलाई आफ्नो प्रतिभा प्रस्तुत गर्ने महत्वपूर्ण अवसर प्रदान गर्ने विश्वास लिइएको छ।

लगत्तै, मन्त्री जयसवाल पर्सा क्षेत्र नम्बर २ को बहुदरमाई नगरपालिका वडा नम्बर २ पुगे, जहाँ उनले एक रक्तदान कार्यक्रमको उद्घाटन गरे। यो कार्यक्रमले मानवीय सेवाभावलाई प्रवद्र्धन गर्नुका साथै रगतको आवश्यकता भएकाहरूलाई सहयोग पुग्ने उद्देश्य राखेको छ।

त्यसपछि पर्सा क्षेत्र नम्बर ३ का विभिन्न स्थानमा पुगी मन्त्री जयसवालले विकासका थुप्रै योजनाहरूको शिलान्यास गरे। यस क्षेत्रमा सडक, खानेपानी, शिक्षा लगायतका पूर्वाधार विकासका योजनाहरू अगाडि बढ्ने भएका छन्।

दिनको अन्त्यमा, मन्त्री जयसवाल पर्सा क्षेत्र नम्बर ४ स्थित जगरनाथपुर गाउँपालिका वडा नम्बर ३ मा पुगे र त्यहाँ निर्माणाधीन खेलकूद रङ्गशालाको शिलान्यास गरे। यस रङ्गशालाको निर्माणले स्थानीय युवाहरूलाई खेलकुदमा आकर्षित गर्नुका साथै राष्ट्रिय स्तरका खेलाडी उत्पादनमा समेत सहयोग पुग्ने अपेक्षा गरिएको छ।

एकै दिन चारवटै निर्वाचन क्षेत्रमा पुगी विकासका यति धेरै कार्यक्रमको उद्घाटन र शिलान्यास गरेर मन्त्री जयसवालले पर्सा जिल्लाको विकासका लागि आफू र प्रदेश सरकार गम्भीर रहेको सन्देश दिएका छन्। यी कार्यक्रमहरूले स्थानीय स्तरमा उत्साह जगाएको छ