वीरगञ्ज । चैत २९ गते बिहीबार सार्वजनिक बिदा हुने भएको छ ।
इस्लाम धर्मावलम्बीको पर्व इद (इद उल फित्र)का अवसरमा चैत २९ गते बिहीबार सार्वजनिक बिदा दिन मुस्लिम आयोगले गृह मन्त्रालयलाई सिफारिस गरेको हो ।
इस्लाम धर्मावलम्बीले २९ दिनको रोजा (बर्त) बसिसकेको र बुधवार साँझ चन्द्रमा नदेखिएका कारण बिहीबार सार्वजनिक बिदा दिनका लागि सिफारिस गरिएको मुस्लिम आयोगका अध्यक्ष समिम मियाँ अन्सारीले जानकारी दिए ।
उनका अनुसार बुधवार साँझ चन्द्रमा देखिएको भए बुधवार सार्वजनिक बिदा दिनका लागि सिफारिस गर्ने तयारी थियो । तर, बुधवार साँझ मुलुकभर कहीँ कतै पनि चन्द्रमा नदेखिएका कारण बिहीबार सार्वजनिक बिदा दिनका लागि मन्त्रालयलाई सिफारिस गरिएको अध्यक्ष मियाँले बताए ।
सरकारले यस अघि नै आगामी वर्ष २०८१ सालका लागि सार्वजनिक बिदा दिने निर्णय गर्दा इस्लाम धर्मावलम्बीको पर्व इद (इद उल फित्र)का दिन सार्वजनिक बिदा दिने निर्णय गरिसकेको छ । सम्बन्धित समुदायको सिफारिस गरेको दिनमा गृह मन्त्रालयले इदको सार्वजनिक बिदा दिँदै आएको छ ।