जनकपुरधाम : जनकपुर–पोखरा सिधा हवाई उडान सेवा सुरु हुने भएको छ । शनिबार हुने पहिलो उडानमा गण्डकीका मुख्यमन्त्री कृष्णचन्द्र नेपाली जनकपुर आउने प्रदेश सरकारका प्रवक्ता एवम् अर्थमन्त्री शैलेन्द्र साहले बताए ।
मुख्यमन्त्री नेपालीलाई जनकपुरमा मधेस प्रदेशका मुख्यमन्त्री लालबाबु राउतले स्वागत गर्नेछन् । जनकपुरधामको जानकी मन्दिर, विवाहमण्डप लगायतको अवलोकन गर्ने कार्यक्रम छ । सिधा उडानले पर्यटन प्रवर्द्धन हुने अपेक्षा गरिएको मन्त्री साहले बताए । पहिलो चरणमा बुद्ध एयरले उडान गर्दै छ ।
नेपाल एसोसिएसन अफ टुर एण्ड ट्राभल एजेन्ट्स (नाट्टा) मधेश प्रदेशको समन्वयमा मुख्यमन्त्री नेपाली जनकपुरधाम आउन लागेका हुन् । यसअघि मधेशका मुख्यमन्त्री राउत गत असोज ६ मा पोखरा भ्रमणमा गएका थिए । सप्ताहमा तीन उडान गरिने तयारी गरिएको छ । यात्रुको चाप बढे उडान सेवासमेत थप हुने जनाइएको छ । कोरोना महामारीका कारण दुई वर्षदेखि जनकपुर–पोखरा उडान स्थगित थियो ।
साताको तीन दिन मंगलबार, बिहीबार र शनिबार जनकपुर–पोखरा हवाई उडान हुने बुद्ध एयर जनकपुरका प्रमुख विजय सिंहले बताए । जनकपुर–पोखरा राजमार्गबाट आवतजावत गर्न १० घण्टा लाग्छ । लामो दूरीका कारण पर्यटकलाई आवतजावतमा असहज हुँदा जनकपुर र पोखराका पर्यटक काठमाडौं पुगेर ती सहर जान बाध्य थिए । पोखरा जनकपुरमा हवाई उडान अवधि ४५ मिनेटको हुने सिंहले बताए । ‘पहिलो दिन १८ सिटको विमान आउन लागेको छ,’ उनले भने, ‘बुद्ध एयरसँग १८, ४२ र ७२ सिटको विमान छ । यात्रुको चापअनुसार थपघट हुनेछ ।’
तपाईको प्रतिक्रिया !