राजन कुमार बानिया । पर्सा २४ बैशाख । कोभिड-१९ संक्रमणको रोकथाम तथा जोखिम न्यूनीकरणका लागि सशस्त्र प्रहरी भिखमपुरद्वारा संचालित तपाईंको मास्क खोई कार्यक्रम अन्तर्गत नि:शुल्क मास्क वितरण गरिएको सशस्त्र प्रहरी निरीक्षक किशमान तामाङले बताए ।
नयाँ भेरियन्ट सहितको कोभिड-१९ को संक्रमण बढ्दै गएको सन्दर्भमा यसबाट सिर्जना हुन सक्ने समस्या र चुनौतीलाई दृष्टिगत गरी संक्रमण रोक्न तोकिएको सुरक्षा मापदण्डलाई दुरुस्त रुपमा कार्यान्वयनका लागि सशस्त्र प्रहरीले ‘संक्रमणबाट आफू बचौँ र अरुलाई पनि बचाऔँ’ भन्ने नारा सहित ‘तपाईंको मास्क खै ?’ लगायतका विभिन्न सचेतनामूलक कार्यक्रमलाई अभियानकै रुपमा सञ्चालन गरेको हो ।

अभियानको क्रममा बितेको २४ घण्टामा मास्क नलगाई हिँडडुल गर्ने ५ हजार जनालाई होल्डिङ जोनमा राखी सम्झाई बुझाई छाडिएको तामाङले बताए छ ।
कार्यक्रम अन्तर्गत सशस्त्र प्रहरीले विभिन्न स्थानहरूमा कोभिड-१९ को जोखिम न्यूनीकरणको लागि सचेतनामूलक सन्देश सहितको माइकिङ, सवारी साधनहरूको जाँच, सचेतनामूलक प्लेकार्ड प्रदर्शन लगायतका कार्यक्रमहरू मार्फत भीडभाड नगर्न, अनावश्यक रुपमा घर बाहिर हिँड्डुल नगर्न, स्वास्थ्य सुरक्षाका मापदण्डहरु पालनाका लागि मास्क तथा स्यानिटाइजरको सहि प्रयोग र नियमित मास्क लगाउन सबैमा अनुरोध समेत गरेको छ ।
कार्यक्रमलाई थप प्रभावकारी र सफल बनाउन सशस्त्र प्रहरीले अन्य सुरक्षा निकाय लगायतका सरोकारवालाहरुसँग आवश्यक समन्वय, सहकार्य गरी अनुगमनलाई समेत तिब्रता दिएको छ ।