वीरगन्ज, १९ फागुन । आगामी बिहीबार हुने प्रतिनिधिसभा निर्वाचनका लागि निर्वाचन आयोगले मतदान अघिको ४८ घण्टादेखि मौन अवधि सुरु गरेको छ। निर्वाचन व्यवस्थापनका दृष्टिले यो अवधिको विशेष महत्त्व रहने जनाइएको छ।
आयोगका अनुसार मौन अवधिमा कुनै पनि प्रकारका निर्वाचन प्रचारप्रसार, सभा, सम्मेलन, अन्तरक्रिया, कार्यशाला वा गोष्ठी गर्न पाइँदैन। बाजा बजाउने, नाचगान गर्ने, सार्वजनिक भोजभतेर आयोजना गर्ने, जुलुस प्रदर्शन गर्ने वा हुलहुज्जत तथा होहल्ला गर्नसमेत निषेध गरिएको छ।
यस अवधिमा सामाजिक सञ्जाल, अनलाइन, छापा वा अन्य माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचार सामग्री पोस्ट वा शेयर गर्न पाइँदैन। साउण्ड सिस्टम, एसएमएस वा अन्य माध्यम प्रयोग गरी मत माग्नसमेत रोक लगाइएको छ।
मतदान सुरु हुनुभन्दा तीन घण्टा अघिदेखि मतदान समाप्त नभएसम्म मतदाता, मतदान केन्द्र वा त्यहाँ खटिएका कर्मचारीलाई बाधा पुर्याउने कुनै पनि गतिविधि गर्न नपाइने आयोगले स्पष्ट पारेको छ।
साथै, राजनीतिक दल तथा उम्मेदवारले सामाजिक सञ्जालमार्फत गरिएका विज्ञापन तथा प्रचार सामग्री हटाउनुपर्नेछ। मतदान स्थलको तीन सय मिटर वरिपरि राखिएका प्रचार सामग्रीसमेत ४८ घण्टा अगावै हटाउन निर्देशन दिइएको छ।
आयोगले मतदान केन्द्र र वरपर शान्ति कायम राख्न, भय–त्रास सिर्जना नगर्न र निर्वाचनको वातावरण नबिथोल्न सबै सरोकारवालालाई आग्रह गरेको छ।
प्रतिक्रिया दिनुहोस्
सम्बन्धित खबर
