बिरगंज,६ पुष । बीरगञ्ज महानगरपालिका वडा नं. ५ अन्तर्गत कुम्हालटोलस्थित रेल्वे रोडमा रहेको एक रक्सी पसलमा खाना पकाउने ग्यास बिस्फोट भएपछि भीषण आगलागी भएको छ। एक्कासि भएको ग्यास बिस्फोटसँगै आगो तीव्र रूपमा फैलिँदा आसपासका पसल तथा बस्तीमा त्रासको वातावरण सिर्जना भएको छ।
प्रत्यक्षदर्शीका अनुसार पसलभित्र प्रयोगमा रहेको खाना पकाउने ग्यास अचानक बिस्फोट हुँदा ठूलो आवाज आएको थियो। बिस्फोटको आवाज टाढासम्म सुनिएको र त्यसपछि केही क्षणमै आगोले पसललाई पुरै घेरेको उनीहरूले बताएका छन्। आगलागीका कारण पसलभित्र रहेका सामग्री जलेर नष्ट भएको छ ।
सूचना प्राप्त हुनासाथ दमकल, नेपाल प्रहरी, सशस्त्र प्रहरी बल नेपाल तथा स्थानीयवासीको सहयोगमा आगो नियन्त्रणमा लिने प्रयास तीव्र रूपमा अगाडि बढाइएको थियो। दमकलको सहायताले आगो फैलिन नदिन प्रयास भइरहेको भए पनि आगलागीको तीव्रताका कारण नियन्त्रणमा लिन केही समय लागेको जनाइएको छ।
हालसम्म आगलागीबाट मानवीय क्षतिको स्पष्ट विवरण भने प्राप्त भइसकेको छैन। प्रहरीले घटनाबारे थप अनुसन्धान भइरहेको र क्षतिको यकिन विवरण संकलन गर्ने कार्य जारी रहेको जनाएको छ। आगलागीको कारण ग्यास चुहावट वा प्राविधिक कमजोरी हुन सक्ने प्रारम्भिक अनुमान गरिएको छ।
स्थानीय प्रशासनले ग्यास प्रयोग गर्दा विशेष सावधानी अपनाउन सर्वसाधारणलाई आग्रह गरेको छ। साथै, यस्ता घटनाबाट जोगिन ग्यास सिलिन्डरको नियमित जाँच, सुरक्षित भण्डारण र सावधानीपूर्वक प्रयोग गर्न आवश्यक रहेको प्रशासनले जनाएको छ ।
प्रतिक्रिया दिनुहोस्
सम्बन्धित खबर
