पर्सामा राष्ट्रिय परिचयपत्र लिन नागरिकहरूले ठूलो सास्ती भोग्नु परेको छ। बिहान ६ बजेदेखि लाइनमा बसेर पनि सहज रूपमा सेवा नपाएको गुनासो स्थानीयहरूले गरेका छन्।

जिल्ला प्रशासन कार्यालय, पर्साको राष्ट्रिय परिचयपत्र वितरण शाखाले नागरिकलाई सहज सेवा दिने प्रयास गरे पनि सफल हुन नसकेको गुनासो छ। कार्यालयको सूचना अनुसार बिहान ७:३० देखि साँझ ७ बजे सम्म सेवा दिने भनिए पनि वास्तविकतामा जनताले समयमै सेवा पाउन सकेका छैनन्।

ग्रामीण भेगका नागरिकहरू बिहान ५ बजे घरबाट हिँडेर कार्यालय पुग्दा पनि घण्टौं लाइनमा बस्न बाध्य छन्। कर्मचारीहरू समयमा कार्यालय आए पनि काममा ढिलाइ गरेर जनतालाई थप सास्ती दिने गरेको गुनासो आएको छ।

नागरिकहरूले कार्यालय व्यवस्थापन सुधार गर्न र प्रभावकारी सेवा प्रदान गर्न माग गरेका छन्।