वीरगञ्ज,११ फागुन। पर्सा जिल्लाको वीरगञ्ज महानगरपालिका क्षेत्रमा प्रमुख जिल्ला अधिकारीले कर्फ्यू आदेश जारी गरेका छन्। पछिल्लो सुरक्षा वस्तुस्थितिलाई मध्यनजर गर्दै आज मिति २०८२/११/११ गते बिहान ९:४५ बजेदेखि अर्को आदेश नभएसम्म लागू हुने गरी कर्फ्यू घोषणा गरिएको हो।
स्थानीय प्रशासन ऐन, २०२८ को दफा ६ (क) बमोजिम जारी गरिएको उक्त आदेशअनुसार तोकिएको चार किल्लाभित्र कसैले आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक तथा घेराउ गर्न नपाउने व्यवस्था गरिएको छ।

तोकिएको चार किल्ला:
पूर्व: बाइपास रोड
पश्चिम: सिर्सिया नदी
उत्तर: गण्डक चौक
दक्षिण: शंकराचार्य गेट

प्रशासनले शान्ति–सुरक्षा कायम राख्न तथा सम्भावित अप्रिय घटनालाई रोक्न कर्फ्यू आदेश जारी गरिएको जनाएको छ। आदेश उल्लंघन गर्ने जो–कोहीमाथि प्रचलित कानुन बमोजिम कारबाही गरिने चेतावनी दिइएको छ।

अत्यावश्यक सेवामा छुट
कर्फ्यू अवधिभर अत्यावश्यक सेवाका सवारी साधनहरूलाई भने सञ्चालनमा सहजीकरण गरिनेछ। एम्बुलेन्स, दमकल, शववाहन, स्वास्थ्यकर्मीका सवारी साधन, सञ्चारकर्मी, विश्वविद्यालयका पूर्वनिर्धारित परीक्षाका परीक्षार्थी तथा परीक्षा केन्द्रमा खटिने कर्मचारी, पर्यटक सवारी साधन, मानवअधिकार तथा कूटनीतिक नियोगका सवारी साधन र हवाई टिकटको आधारमा हवाई यात्रुहरूको आवागमनमा सुरक्षाकर्मीबाट सहजीकरण गरिने प्रशासनले जनाएको छ।

प्रशासनले नागरिकहरूलाई कर्फ्यू आदेशको पूर्ण पालना गर्न तथा अफवाहमा नलागी शान्ति कायम राख्न आग्रह गरेको छ।