पर्सा। सखुवा प्रसौनी गाउँपालिकाको १४औं गाउँसभा आर्थिक वर्ष २०८१/८२ को उद्घाटन गाउँपालिका अध्यक्ष जसवन्त यादवको अध्यक्षतामा भव्य रूपमा सम्पन्न भएको छ। उक्त सभामा प्रमुख प्रशासकीय अधिकृत रामबाबु कुशवाह, उपाध्यक्ष शर्मिला बिष्ट महतो, छ वटै वडाका अध्यक्षहरू, वडा सदस्यहरू, महिला प्रतिनिधिहरू, स्थानीय जनप्रतिनिधिहरू तथा सरोकारवाला निकायहरूको उल्लेखनीय उपस्थिति रहेको थियो।
गाउँसभाको उद्घाटन गर्दै अध्यक्ष यादवले स्थानीय विकासलाई तीव्रता दिन चालु आर्थिक वर्षका लागि तय गरिएका योजनाहरू प्रस्तुत गरे। उनले शिक्षा, स्वास्थ्य, कृषि, पूर्वाधार, रोजगारी प्रवर्द्धन, महिला सशक्तीकरण, वातावरणीय संरक्षण तथा सूचना प्रविधिको प्रवर्द्धनलाई प्राथमिकता दिइने बताए। साथै, समृद्ध र आत्मनिर्भर गाउँपालिका निर्माणका लागि सबै पक्षको सहकार्य आवश्यक रहेकोमा उनले विशेष जोड दिए।
सभामा गाउँपालिकाको वार्षिक नीति तथा कार्यक्रम, बजेट, विकास निर्माण योजना, सामाजिक सुरक्षा कार्यक्रम, कृषि अनुदान लगायतका महत्वपूर्ण निर्णयहरू पारित गरियो। विभिन्न वडाबाट उठाइएका जनचासोका विषयमा गहन छलफल गर्दै स्थानीय आवश्यकता अनुरूप नीति निर्माण गरिने निर्णय गरिएको छ।
गाउँपालिकाको उपाध्यक्ष शर्मिला बिष्ट महतोले विशेषगरी महिला सशक्तीकरण, स्वास्थ्य र बालविकासका कार्यक्रमहरूलाई अझ प्रभावकारी बनाउन नयाँ योजनाहरू ल्याउनुपर्ने आवश्यकता औंल्याइन्। वडा अध्यक्षहरू तथा अन्य जनप्रतिनिधिहरूले आ–आफ्ना वडाका समस्याहरू राख्दै ती समस्याको समाधानका उपायहरू प्रस्तुत गरे।
गाउँसभामा स्थानीय पूर्वाधार विकासका योजनाहरू, कृषक अनुदान, युवा स्वरोजगार कार्यक्रम, शिक्षा तथा स्वास्थ्य सेवाको सुधार तथा डिजिटल प्रविधिको प्रभावकारी प्रयोगका विषयमा व्यापक छलफल भएको थियो। स्थानीय बासिन्दाहरूले विकास निर्माणका कार्यहरूमा अझ पारदर्शिता र प्रभावकारिता आवश्यक रहेको सुझाव दिँदै गाउँपालिकासँग आफ्ना मागहरू राखे।
गाउँसभा सफलतापूर्वक सम्पन्न भएपछि सहभागीहरूले स्थानीय विकासका लागि यस्ता सभा अपरिहार्य हुने बताउँदै सकारात्मक प्रतिक्रिया जनाए। अध्यक्ष यादवले गाउँपालिकाको समृद्धिका लागि सबै पक्षहरूको सहकार्य अनिवार्य रहेको उल्लेख गर्दै आगामी दिनमा अझ प्रभावकारी कार्यक्रमहरू ल्याइने प्रतिबद्धता व्यक्त गरे।
