नवल यादव । पर्सा ।। निर्वाचन क्षेत्र नं. ३ (क) प्रदेश सभा सदस्य प्रत्याशी तथा नेकपा (माओवादी केन्द्र) पर्साका नेता शिवकुमार साह तेलिको प्रमुख आतिथ्यमा सखुवा प्रसौनी गाउँपालिका वडा नं. १, सिद्धपुर फुटबल मैदानमा आयोजित चौथो गोल्ड कप सिद्धपुरको समापन तथा पुरस्कार वितरण कार्यक्रम सम्पन्न भएको छ। कार्यक्रमको आयोजना श्री बनश्कती युवा क्लबले “राष्ट्रका लागि खेलकुद, स्वास्थ्यका लागि खेलकुद” भन्ने मूल नाराका साथ गरेको थियो।

आज सम्पन्न फाइनल खेलमा आयोजक टिम सिद्धपुरले बकुलिया बारालाई २-० गोल अन्तरले पराजित गर्दै उपाधि हात पारेको छ। खेलको पहिलो हाफको १५ औं मिनेटमा सिद्धपुरले पहिलो गोल गरेको थियो भने दोस्रो हाफको २० औं मिनेटमा दोस्रो गोल गर्दै जित सुनिश्चित गरेको हो।

कार्यक्रममा विजेता आयोजक टिमलाई सिल्ड, मेडल, प्रमाणपत्रसहित नगद रु. १०,००० प्रदान गरिएको थियो। उपविजेता बकुलिया बारालाई सिल्ड, मेडल, प्रमाणपत्रसहित नगद रु. ५,५०० प्रदान गरिएको आयोजक टिमका पुष्पराज शिल्वालले जानकारी गराएका छन्।

खेलकुदमा अनुशासन र जीवनशैली सुधारका लागि महत्त्वपूर्ण योगदान

कार्यक्रमका प्रमुख अतिथि शिवकुमार साहले खेलकुदले मनोरञ्जन दिनुको साथै अनुशासनमा राख्न र जीवनशैली सुधार गर्न महत्त्वपूर्ण योगदान गर्ने बताए। उनले युवाहरुलाई खेलकुदप्रति आकर्षित गराउनुपर्नेमा जोड दिँदै खेलले नकारात्मक सोच हटाउने, कुलतबाट बचाउने र सामाजिक सद्भाव कायम राख्न सहयोग गर्ने धारणा राखे। साहले खेलकुदलाई प्राथमिकता दिन स्थानीय र प्रदेश सरकारलाई आग्रह गर्दै वर्तमान मधेस प्रदेश सरकारका खेलकुद मन्त्रीप्रति असन्तोष व्यक्त गरे।

विशिष्ट व्यक्तिहरूको उपस्थिति

कार्यक्रममा पूर्व गाविस अध्यक्ष लालदेव महतो उराँवको अध्यक्षतामा सम्पन्न भएको थियो। प्रमुख अतिथि साहसँगै इप्रका एकटङ्गा प्रमुख साई योगानन्द साह, सशस्त्र प्रहरी बल बागेश्वरी तित्रवना प्रमुख चयमनारायण महतो, पूर्व वडा सदस्यहरू रामा खा थारु, पारस महतो, शिवनाथ थारु लगायत स्थानीय नेताहरू शिवनाथ थारु, ज्ञानेन्द्र दास, प्रभु उराँव, हरिन्द्र चौधरी, चानकेश्वर महतो, पत्रकार नरेश यादव, माओवादी केन्द्रका प्रदीप चौधरी, हटन चौधरी, बिगा महतो, सिकेन्द्र सहनी, बमबहादुर पण्डित लगायतको उपस्थिति रहेको थियो।

कार्यक्रमको स्वागत मन्तव्य आदिवासी जनजाति समाजका नेता बिरेन्द्र उराँवले गरेका थिए भने सहजीकरण नरेश प्रसाद उराँवले गरेका थिए।