पर्सा,२९ बैशाख :पर्साको सखुवा प्रसौनी गाँउपालिका वडा नम्बर १ औराहामा शनिबार अपरान्ह बाघको आक्रमणबाट एक पुरुष गम्भिर घाइते भएका छन् । स्थानीय ३६ बर्षिय भीमबली महत्तो थारु बाघको आक्रमणबाट गम्भिर घाइते भएको र उनको वीरगन्जस्थित नारायणी अस्पतालमा उपचार भइरहेको पर्साका प्रहरी नायब उपरीक्षक कुमार विक्रम थापाले जानकारी दिए । महतोलाई आक्रमण गर्ने बाघलाईपनि स्थानीयले कुटेर मारिदिएको खबरपनि आएको उनले बताए ।

प्रहरीका अनुसार, शनिबार अपरान्ह ५ बजेतिर महत्तो घर नजिकैको मकैबारीमा गएका बेला बाघको आक्रमणमा परेका हुन् ।मकै बारी नजिकै रहेको खोल्सामा पुगेका महत्तोलाई बाघले आक्रमण गर्दै घिसारेर लैजान थालेपछि नजिककै रहेका अरु मानिसले होहल्ला गरेपछि बाघले महत्तोेलाई छाडेको स्थानीयलाई उधृत गर्दै इलाका प्रहरी कार्यालय पटेर्वा सुगौलीका प्रहरी निरीक्षक रामराजा केशरीले बताए ।

महत्तोलाई आक्रमण गरेको बाघलाई उनका गाँउका मानिसहरुले घेरा हालेर बञ्चरो , भाला र लठ्ठीले हानेर मारिदिएको प्रहरीले जनाको छ । स्थानीयको आक्रमणबाट मरेको बाघ अहिले घटनास्थलमै छ । यस सम्बन्धमा जिल्ला प्रहरी कार्यालयमा खबर गरिएको प्रहरी निरीक्षक केशरीले बताए ।